Agent komandası: beş Claude bir otaqda

02 · settings.json

Agent komandalarını açın

Agent komandaları Claude Code-da hələ sınaq funksiyasıdır və susmaya görə bağlıdır. Onu açmaq üçün bu sətirləri ayarlar faylına əlavə edin: macOS və Linux-da ~/.claude/settings.json, Windows-da istifadəçi qovluğunuzdakı .claude\settings.json. Fayl yoxdursa, yaradın.

Faylda artıq başqa ayarlar varsa, onları silməyin: env hissəsini mövcud ayarların yanına əlavə edin.

{
  "env": {
    "CLAUDE_CODE_EXPERIMENTAL_AGENT_TEAMS": "1"
  }
}

Claude Code sənədləri: agent komandaları (yeni pəncərədə açılır)

03 · CSV, Excel

Rəqəmləri hazırlayın

Komanda yalnız ona verdiyiniz rəqəmlərlə işləyir. Yeni qovluq açın və sualınıza aid hesabatları ora qoyun: müraciətlərin siyahısı, reklam kabinetinin hesabatı, Google Analytics və ya Search Console-dan yükləmə. CSV və Excel faylları ən rahatıdır.

Fayllarda müştərilərin adı, telefonu və ya e-poçtu varsa, əvvəlcə bu sütunları silin. Analiz üçün tarix, mənbə və say kifayətdir.

Sonra terminalda bu qovluğa keçin və claude yazın.

04 · Prompt

Promptu yapışdırın

Aşağıdakı promptu Claude Code-a yapışdırın. Kvadrat mötərizədəki iki yeri dəyişin: sualınızı və fayllarınızın adlarını. Rolları öz sahənizə uyğunlaşdıra bilərsiniz, amma hakimi saxlayın: o, nəzəriyyə müdafiə etmir, yalnız rəqəmləri yoxlayır.

Agent komandası yarat. Sual: [Məsələn: keçən ay saytımıza gələn müraciətlər niyə artdı?]
Məlumat: bu qovluqdakı fayllar [məsələn: muracietler.csv, reklam.csv, analytics.csv].

Beş komanda üzvü yarat və onlara bu adları ver:
1. marketoloq: səbəbi reklamda və kampaniyalarda axtarır.
2. dizayner: səbəbi saytın dizaynında və rahatlığında axtarır.
3. şübhəçi: bunun təsadüf, mövsüm və ya ölçmə xətası olduğunu yoxlayır.
4. psixoloq: səbəbi müştərinin qərar verməsində axtarır.
5. riyaziyyatçı: nəzəriyyə müdafiə etmir, hakimdir. Hər iddianı yalnız fayllardakı rəqəmlərlə yoxlayır.

Qaydalar:
- Hər nəzəriyyə ən azı bir rəqəmə və onun olduğu fayla istinad etsin.
- 1-ci turda hər kəs öz nəzəriyyəsini yazsın. 2-ci turda bir-birinə yazsınlar və elmi mübahisədə olduğu kimi bir-birinin nəzəriyyəsini rəqəmlə təkzib etməyə çalışsınlar.
- Riyaziyyatçı rəqəmlə təkzib olunan nəzəriyyəni ÇIXDI kimi işarələsin və səbəbini bir cümlə ilə yazsın.
- Fayllarda olmayan rəqəmi uydurmayın. Məlumat çatmırsa, bunu açıq deyin.
- Komanda üzvləri faylları dəyişməsin, yalnız oxusun.

Sonda mənə qısa hesabat ver: ayaqda qalan nəzəriyyə və onu dəstəkləyən rəqəmlər, çıxan nəzəriyyələr və səbəbləri, bunu yoxlamaq üçün növbəti addım.

Komanda işləyəndə

Claude komandanın rəhbəri olur və üzvləri yaradır. Onlar yazı sahəsinin altındakı paneldə görünür: oxlarla birini seçib Enter basanda onun işini görürsünüz və ona birbaşa yaza bilərsiniz.

Claude komanda yerinə adi köməkçi agentlərlə (subagent) işləsə, bir daha xahiş edin və agent komandası istədiyinizi açıq yazın.

Mübahisə bitəndə rəhbər hesabatı yazır. Ayaqda qalan nəzəriyyəni dəstəkləyən rəqəmləri fayllarda özünüz bir də yoxlayın: hesabat qərar üçün başlanğıcdır, qərarın özü deyil.

Diqqət. Komanda tək söhbətdən xeyli çox token işlədir, çünki hər üzv ayrıca Claude sessiyasıdır. Sadə sual üçün tək söhbət kifayətdir. Komandanı səbəbi aydın olmayan və bir neçə izahı ola bilən suallar üçün saxlayın.